پاکستان یو اے ای کی ایک ارب ڈالر کی ذمہ داری فوجی فاؤنڈیشن کے شیئرز سے ختم کرے گا
محمد عمران :اسلام آباد (28 دسمبر 2025) – پاکستان اور متحدہ عرب امارات کے درمیان اقتصادی تعلقات کو مزید مضبوط بنانے کے لیے ایک اہم پیش رفت سامنے آئی ہے۔ نائب وزیراعظم اور وزیر خارجہ اسحاق ڈار نے بتایا کہ یو اے ای ادارے فوجی فاؤنڈیشن سے منسلک کمپنیوں میں شیئرز حاصل کریں گے، جس کے نتیجے میں پاکستان کی ایک ارب ڈالر کی بیرونی ذمہ داری مکمل طور پر ختم ہو جائے گی۔اسحاق ڈار نے سالانہ پریس کانفرنس میں کہا کہ یہ معاہدہ یو اے ای کے صدر کے حالیہ دورہ پاکستان کے دوران ہونے والی بات چیت کا نتیجہ ہے۔ فوجی فاؤنڈیشن اس ٹرانزیکشن کی قیادت کر رہی ہے اور مختلف کمپنیوں میں جزوی شیئرز کی منتقلی کے ذریعے یہ ڈیل مکمل کی جائے گی۔ توقع ہے کہ یہ عمل 31 مارچ 2026 تک پایہ تکمیل کو پہنچ جائے گا۔
ان کا کہنا تھا کہ اس اقدام سے نہ صرف قرض کی ادائیگی کا بوجھ کم ہو گا بلکہ یہ رقم پاکستان کے بیرونی قرضوں کی فہرست سے خارج ہو جائے گی، جو ملک کی مالی پوزیشن کو مزید مستحکم بنائے گا۔ اس کے علاوہ، یو اے ای کی طرف سے مزید دو ارب ڈالر کے قرضے کو رول اوور کرنے یا سرمایہ کاری میں تبدیل کرنے پر بھی غور کیا جا رہا ہے۔اسحاق ڈار نے سعودی عرب، چین اور یو اے ای کا شکریہ ادا کیا کہ ان ممالک نے مشکل اوقات میں پاکستان کی مالی مدد کی۔ انہوں نے کہا کہ حکومت کی فعال خارجہ پالیسی کی بدولت پاکستان اب عالمی سطح پر ایک مضبوط اور معتبر ملک کے طور پر ابھر رہا ہے۔ یہ ڈیل قرضوں کو طویل مدتی سرمایہ کاری میں تبدیل کرنے کی حکمت عملی کا حصہ ہے، جو ملک کی معیشت کو پائیدار ترقی کی طرف لے جائے گی۔
