برطانیہ میں شہزاد اکبر پر حملہ: ناک اور جبڑا فریکچر، اسپتال میں زیر علاج

محمد عمران (ویب ڈیسک): 26 دسمبر 2025 – سابق وزیر اعظم عمران خان کے مشیر احتساب مرزا شہزاد اکبر پر برطانیہ کے شہر کیمبرج میں ان کی رہائش گاہ پر نامعلوم حملہ آور نے شدید تشدد کیا، جس کے نتیجے میں ان کی ناک اور جبڑا فریکچر ہو گیا۔ وہ اسپتال میں زیر علاج ہیں۔پاکستان تحریک انصاف (پی ٹی آئی) کے مطابق، 24 دسمبر کو صبح کے وقت ایک 25 سے 30 سال کی عمر کا سفید فام حملہ آور، جو ماسک اور دستانے پہنے ہوئے تھا، شہزاد اکبر کے گھر میں داخل ہوا۔ حملہ آور نے ان کا نام پوچھا اور فوراً چہرے پر متعدد مکے برسائے۔ حملہ کے دوران وہ بے ہوش ہو گئے، حملہ آور نے ویڈیو بھی بنائی اور تصاویر لیں، پھر فرار ہو گیا۔شہزاد اکبر نے خود بیان دیا کہ حملہ آور کنسٹرکشن یا ویسٹ کلیکشن کی وردی میں تھا اور حملہ منصوبہ بند لگتا ہے۔ انہوں نے برطانوی پولیس میں شکایت درج کرا دی ہے، جو سی سی ٹی وی فوٹیج اور دیگر شواہد کی بنیاد پر تحقیقات کر رہی ہے۔

پی ٹی آئی نے اس حملے کی شدید مذمت کی اور اسے سیاسی مخالفین کی حفاظت پر سنگین سوال قرار دیا۔ پارٹی کا کہنا ہے کہ شہزاد اکبر حالیہ دنوں میں پاکستان کی فوجی قیادت کے خلاف لندن میں احتجاج کے دوران سخت تقریر کر چکے تھے، جس کے بعد یہ حملہ ہوا۔ یہ 2023 میں ان پر تیزاب پھینکنے کے حملے کے بعد برطانیہ میں دوسرا واقعہ ہے۔شہزاد اکبر 2022 سے برطانیہ میں خود ساختہ جلاوطنی میں ہیں اور پاکستان میں ان کے خلاف احتساب کے مقدمات چل رہے ہیں۔ برطانوی پولیس نے حملے کی تصدیق کرتے ہوئے کہا کہ تحقیقات جاری ہیں۔