صدر آصف علی زرداری آج سے عراق کے پانچ روزہ سرکاری دورے پر روانہ

محمد عمران:اسلام آباد: صدر مملکت آصف علی زرداری عراقی صدر ڈاکٹر عبداللطیف جمال رشید کی دعوت پر 20 سے 24 دسمبر تک عراق کا سرکاری دورہ کریں گے۔ یہ دورہ دونوں برادر ممالک کے درمیان قائم تاریخی، مذہبی اور ثقافتی رابطوں کو مزید مستحکم کرنے کا ایک اہم قدم ہے۔ دفتر خارجہ کے مطابق، دورے کے دوران صدر زرداری عراقی قیادت سے اہم ملاقاتیں کریں گے جن میں دوطرفہ تعلقات کا مکمل جائزہ لیا جائے گا اور تجارت، سرمایہ کاری، توانائی کے شعبے، تعمیر نو، افرادی قوت کی منتقلی، ٹیکنالوجی، تعلیم اور عوامی سطح پر رابطوں کو بڑھانے کے لیے نئے مواقع تلاش کیے جائیں گے۔

اس دورے سے پاکستان اور عراق کے درمیان معاشی اور سفارتی روابط کو نئی جہت ملے گی، جو نہ صرف دونوں ملکوں کی ترقی میں مددگار ثابت ہوگی بلکہ علاقائی استحکام اور امن کو بھی فروغ دے گی۔ پاکستان عراق کے ساتھ اپنی مسلسل مصروفیت کو جاری رکھنے کا عہد کرتا ہے اور ایک ایسے اسٹریٹجک پارٹنرشپ کی طرف بڑھ رہا ہے جو مستقبل میں مزید نتیجہ خیز ثابت ہو۔ دورہ پاکستان کی عراق کے ساتھ گہری دوستی اور باہمی احترام کی عکاسی کرتا ہے۔